Réussite Haïti - Plateforme de préparation des examens officiels haïtiens

MENFP • KRÈYÒL 9e AF

Egzamen tip

⏱️ Egzamen ofisyèl — 2 h ⏱️ 02:00:00 ▶ Demare ⏸ Poz

Konsiy : Gen 3 seksyon. Antoure bon repons kote sa mande. Ekri repons yo klèman.

📘 Ed-memwa(louvri si w bezwen)

---

• SP / SF — SP = sans pwòp (literal) ; SF = sans figire.
• Aspè — inakonpli (ap/t ap/k ap), akonpli (te), pwospektif (pral/va), iteratif (chak jou/toujou).
• Figi stil — ipèbòl (egzajerasyon), anafò (repete menm mo nan kòmansman fraz la), metonimi (konteni pou kontenan an), antitèz (opozisyon), konparezon, metafò.
• Predika — vèbal / nominal / adjektival / prepozisyonèl / advèbyal.
• Varyasyon fonolojik — chanjman pwononsyasyon/ekriti nan pale (eg. cheni=chini, degobe=degobye).

KREYÒL AYISYEN — 100 pwen

I. Kesyon sou tèks (30) • II. Vokabilè – Òtograf – Gramè (40) • III. Pwodiksyon ekri (30)

---

Tèks: « Kaye plan »

Yon jedi apremidi, Maliya soti lekòl ak yon kaye plan nan men li. Depi kèk semèn, li t ap òganize tan li pi byen: li ekri sa li gen pou li fè, lè li pral etidye, ak ki jou li pral repase. Lakay li, manman li toujou repete: “kontwole tan w, ou kontwole tèt ou.”

Sou wout la, Maliya tande yon gwoup timoun ap diskite sou yon ti pwojè pou netwaye lakou lekòl la. Yo t ap chèche volontè. Li pa t fin sèten si l t ap gen tan, men li sonje objektif li: pase egzamen 9e AF ak bon nòt, epi rete yon moun ki itil pou lòt moun.

Vandredi a, apre klas, li rete. Li pa fè bri. Li ranmase papye, mete boutèy plastik nan yon sak, epi li ede ranje yon ti kwen kote yo konn chita. Direktè a wè sa, li di: “Mèsi, pitit mwen. Se ti aksyon konsa ki fè lekòl la respire.” Maliya souri, li santi kè li vin pi lejè.

Nan aswè, li louvri ti kaye plan li an. Li mete yon ti zetwal bò kote “revizyon” paske li respekte orè li. Apre sa, li ekri yon fraz: “Bon disiplin se yon chemen.” Lè li fini, li priye, epi li dòmi san estrès.

I. Kesyon sou tèks la (30 pwen)

Antoure lèt ki devan bon repons lan pou kesyon 1 rive 3.

1.Tèks sa a se yon tèks: (4 pwen)
a) Tèks eksplikatif b) Tèks naratif  c) Tèks deskriptif

2.Kote prensipal istwa a ap dewoule se: (4 pwen)
a) Nan mache  b) Lakay Maliya sèlman  c) Lekòl ak sou wout lekòl la  d) Nan legliz

3.Lide prensipal tèks la se: (4 pwen)
a) Vwayaje aletranje  b) Disiplin ak bon aksyon  c) Enpòtans lekòl d) lajan fasil

4.Bay de (2) prèv ki montre Maliya òganize tan li. (6 pwen)

5.Ki aksyon Maliya fè pou ede lekòl la? Explike an 2–3 liy. (6 pts)

6.Ki leson ou tire nan tèks la? Ekri 2–3 liy. (6 pwen)

---

II. Vokabilè – Òtograf – Gramè (40 pwen)

A) Relye gwoup mo yo ak tèm (8 pwen – 2 pwen/chak)

Ekri nan kaz repons lan lèt kolon B a ki koresponn ak chak nimewo kolon A a.

Kolòn A (Gwoup mo)	Repons
7. kaye, plim, liv, revize	____
8. orè, semèn, jedi, vandredi	____
9. sak, boutèy, papye, ranmase	____
10. van, lapli, solèy	____

Kolòn B (Tèm)
A. Meteyo
B. Lekòl
C. Netwayaj
D. Tan

---

B) Sinonim (8 pwen – 2 pwen/chak)

Ranplase ekspresyon souliye a ak yon mo sinonim.

11. Maliya soti lekòl ak yon kaye nan men li. (________)

12. Li t ap òganize tan li pi byen. (________)

13. Li ranmase papye yo nan lakou a. (________)

14. Li dòmi san estrès. (________)

---

C) Definisyon mo (8 pwen – 2 pwen/chak)

15. Bay yon definisyon pou mo: disiplin.

16. Bay yon definisyon pou mo: volontè.

17. Bay yon definisyon pou mo: orè.

18. Bay yon definisyon pou mo: revize.

---

D) Jwenn figi stil pou chak fraz (8 pwen – 2 pwen/chak)

Chwazi figi estil ki bon an: ipèbòl, anafò, Pèsonifikasyon, antitèz.

19. “M ap tann ou depi yon syèk!” → ________

20. “Mwen di wi, li di non.” → ________

21. “Lekòl la respire jodi a.” → ________

22. “Chak jou mwen travay. Chak jou mwen revize.” → ________

---

E) Jwenn aspè tan pou chak fraz (8 pwen – 2 pwen/chak)

Chwazi aspè a: akonpli / inakonpli / pwospektif / iteratif.

23. “Maliya te ekri plan li.” → ________

24. “Li ap revize leson li.” → ________

25. “Manman li pral pale avè l demen.” → ________

26. “Chak wikenn li ale nan bibliyotèk.” → ________

---

F) Varyasyon fonolojik (4 pwen – 2 pwen/chak)

Ranplase mo souliye a ak yon varyasyon fonolojik.

27. “ Likaponnen moun yo.” (________)

28. “Mari al achte medikaman nan famasi a.” (________)

---

G) Sans pwòp / Sans figire (4 pwen – 2 pwen/chak)

Ekri SP si se sans pwòp, SF si se sans figire.

29. “Kè li vin pi lejè.” (____)

30. “ Sak patat sa a lejè anpil.” (____)

---

H) Eksplike sans pwovèb (4 pwen)

31. Eksplike sans pwovèb sa a: “Fouchèt diviyon pa manje kalalou.” (4 pwen)

---

I) Fraz ak advèb negasyon (2 pwen)

32. Pwodui yon fraz ki genyen yon advèb negasyon (eg. jamè, pèsonn, anyen). (2 pts)

---

J) Tan pase + mòd kondisyonèl (2 pwen)

33. Pwodui yon fraz nan tan pase ak mòd kondisyonèl (eg. “Si…, mwen t ap…”). (2 pts)

---

K) Tip predika (2 pwen)

34. Di ki tip predika ki nan fraz sa a: “Mari renmen li anpil.” (2 pts)

---

L) Fòme nouvo mo ak radikal sa yo (4 pwen – 2 pwen/chak)

35. Fòme yon nouvo mo ak radikal tan: (________)

36. Fòme yon nouvo mo ak radikal ranmase: (________)

---

M) Pwonon entèwogatif (4 pwen – 2 pwen/chak)

37. Fòme yon fraz ak pwonon entèwogatif “Kisa”: (________)

38. Fòme yon fraz ak pwonon entèwogatif “Kilès”: (________)

---

III. Pwodiksyon ekri (30 pwen)

Chwazi youn (1) nan sijè yo epi devlope li nan 15 rive 20 liy. Respè estrikti (entwodiksyon, devlopman, konklizyon).

39. Sijè A : Ekri yon tèks naratif sou yon moman kote ou te aprann jere tan ou (orè, plan, revizyon). Rakonte sa ki te pase ak leson ou tire.

40. Sijè B : Ekri yon tèks agimantatif pou montre poukisa disiplin ak solidarite enpòtan nan lekòl. Bay omwen 2 agiman + 1 egzanp.

✅ Korije estriktire – Egzamen KRÈYÒL 9e AF (Kaye Plan an)

---

KORIJE + BARÈM

I. Kesyon sou tèks (1–6) — 30 pts

1. b

2. c

3. b

4. Egzanp (2): li ekri sa li gen pou fè; li mete jou/lè revizyon; li mete zetwal lè li respekte orè; li planifye repase. (6 pts)

5. Li ret apre klas pou netwaye: ranmase papye, mete boutèy nan sak, ranje kwen lakou. (6 pts)

6. Leson posib: disiplin ede w reyisi; bon aksyon itil; òganizasyon diminye strès; fè byen san fè bri. (6 pts)

II.A Rebye tèm (7–10) — 8 pwen

7→B (Lekòl/Etid) • 8→D (Tan/Òganizasyon) • 9→C (Netwayaj) • 10→A (Meteyo)

II.B Sinonim (11–14) — 8 pwen

11. kite lekòl(aksepte: retounen soti lekòl)
12. planifye / ranje / mete nan lòd
13. ranmase = kolekte / rasanble
14. san estrès = anpè / trankil

II.C Definisyon (15–18) — 8 pwen

15. Disiplin: respekte règ etabli; kontwole tèt ou pou fè sa w dwe fè.
16. Volontè: moun ki dispoze ede san yo pa fòse li / san obligasyon.
17. Orè: plan ki montre lè pou fè yon bagay.
18. Revize: repase yon leson pou sonje ak konprann li pi byen kon.

II.D Figi stil (19–22) — 8 pwen

19. Ipèbòl • 20. Antitèz • 21. Pèsonifikasyon• 22. Anafò

II.E Aspè (23–26) — 8 pwen

23. Akonpli • 24. Inakonpli • 25. Pwospektif • 26. Iteratif

II.F Varyasyon fonolojik (27–28) — 4 pts

27. kaponnen / kraponnen• 28. famasi/fonmasi

II.G SP/SF (29–30) — 4 pwen

29. SF • 30. SP

II.H Pwovèb (31) — 4 pwen

31. Sans: Lè gen divizyon, pa gen pwogrè (repons ekivalan ak lòt eksplikasyon klè aksepte)

II.I Advèb negasyon (32) — 2 pwen

Egzanp: “Mwen p ap janm patisipe nan anyen ki wong.” / “Pèsonn pa t la nan moman an.”

II.J Pase + kondisyonèl (33) — 2 pwen

Egzanp: “Si mwen te gen plis tan, mwen t ap revize plis.”

II.K Tip predika (34) — 2 pwen

34. Predika vèbal.

II.L Derivasyon (35–36) — 4 pwen

35. tanporèl (aksepte nenpòt mo kòrèk ki sòti nan radikal “tan”)
36. Ranmasaj(aksepte nenpòt mo kòrèk ki sòti nan “ranmase”)

II.M Pwonon entèwogatif (37–38) — 4 pwen

37. Egzanp: “Kisa ou pral revize aswè a?”
38. Egzanp: “Kilès ki pral avèk ou nan ayewopò?”

III. Pwodiksyon ekri (39 oswa 40) — 30 pwen

Barèm sijere: Respè sijè (6) • Estrikti (6) • Lojik/konektè (6) • Gramè/òtograf/vokabilè (8) • Longè/Prezantasyon (4)